نەوا-
ئیلهام عەلیێڤ سەرۆك كۆماری ئازەربایجان رایگەیاند، وڵاتەكەی بە هەناردەكردنی غاز بۆ ئەوروپا هاوبەشێكی متمانەپێكراوی كەرتی وزەیە.
عەلیێڤ لە 11هەمین كۆبونەوەی ئەنجومەنی راوێژكاری بۆ رێڕەوی غازی باشورو سێهەمین كۆبونەوەی ئەنجومەنی راوێژكاری بۆ وزەی سەوز كە لە باكۆ بەڕێوەچو وتی: لەئێستادا غاز بە 12 وڵات دەفرۆشن كە 10یان وڵاتی ئەوروپان و لەنێویاندا هەشت وڵاتی ئەندامی یەكێتییەكەن، ئاسایشی وزە بەشێكی دانەبڕاوە لەئاسایشی نیشتمانی و سەرچاوەكانی وزە بۆ ئاسایشی پیشەسازی گرنگن.
عەلیێڤ لەبارەی هەناردەكردنی غاز لەلایەن وڵاتەكەیەوە بۆ ئەوروپا وتی: بەردەوام دەبن لەكاركردن لەسەر دامەزراندنی تۆڕی دابەشكردنی غاز لە هەندێك وڵاتی ئەوروپادا كە هەندێكیان پێویستیان بە فراوانكردنی تۆڕی دابەشكردنی غاز هەیەو ئازەربایجان پلانی هەیە ئەو كارە بكات.