نەوا-
بەبۆنەی 45هەمین ساڵیادی جینۆسایدی كوردانی فیلییەوە، وەزارەتی كاروباری شەهیدان و ئەنفالكراوان راگەیەنراوێكی بڵاوكردەوە.
لەبەشێكی راگەیەنراوەكەدا هاتوە، یادی 45هەمین جینۆسایدی هەزاران كوردی فەیلی دەكەینەوە كە لە هەڵمەتێكی دڕندانەی رژێمی پێشوی عیراقدا روبەڕوی كوشتن و راگواستن و لێسەندنەوەی رەگەزنامەو دەستبەسەرداگرتنی ماڵ و سامانیان بون تەنها لەبەرئەوەی كوردبون.
ئاماژەشیكردوە، شاڵاوەكانی جێنۆسایدكردنی كوردی فەیلی رژێمە یەك لە دوای یەكەكانی عیراق بە چەندین قۆناخ ئەنجامدرا لەساڵی 1980 گەیشتە لوتكەی دڕندەیی كاتێك رژێمی پێشو لە پاكتاوێكی نەژادیداو بەهۆی كوردبونیان سەدان هەزاریانی دەركردو هەزارانیشی بێسەروشوێن كردو ناسنامەی لێسەندنەوە.
وەزارەتی كاروباری شەهیدان و ئەنفالكراوانی هەرێم بەپێویستی زانیوە حكومەتی عیراق بەپێی بڕیاری دادگای باڵای تاوانەكان كە بەجینۆسایدی ناساندوە ئەرك و بەرپرسیاریەتی یاسایی و دەستوری خۆی جێبەجێ بكات و بنەماڵەو كەسوكاری قوربانیانی كوردی فەیلی و كۆمەڵكوژییەكانی دیكە قەرەبو بكاتەوەو رەگەزنامەو ماڵ و سامانیان بۆ بگەڕێنێتەوە كێشەكانیان چارەسەر بكات.