نەوا-
دەسەڵاتدارانی چین رایانگەیاند، وەك كاردانەوەیەك بەرامبەر بە بەرزكردنەوەی باج لەلایەن ئەمریكاوە مامەڵەی هاوشێوە لەگەڵ ئەو وڵاتەدا دەكەن.
ئەنجومەنی دەوڵەت كە ئەركی كابینەی حكومەت لە چین ئەنجامدەدات لە راگەیانراوێكدا ئاماژەی بەوەكردوە، جگە لەو باجانەی هەن، هاوشێوەی بڕیارەكەی ترەمپ سەرۆكی ئەمریكا، باجی گومرگی زیاد بەڕێژەی 34% بەسەر هەمو ئەو بەرهەمانە دەسەپێنرێت كە لە ئەمریكاوە هاوردە دەكرێن، لەرۆژی 10/4وە ئەو باجە زیادانە دەچنە بواری جێبەجێكردنەوە.
حكومەتی پەكین بەخێرایی وەڵامی بڕیارەكەی ئەمریكای دایەوە بۆ بەرزكردنەوەی باج و پەیامی ئەوەی نارد كە پاشەكشە ناكات لە وەڵامدانەوەی هەنگاوە تاكلایەنەكانی واشنتۆن بۆ سەپاندنی باجی زیادەو ئامادەی وەڵامدانەوەیە، هاوكات بەهۆی بەرزكردنەوەی باجەوە حكومەتی پەكین لە رێكخراوی بازرگانی جیهانی سكاڵایەكی یاسایی دژی ئەمریكا تۆمار كردو 27 كۆمپانیای ئەمریكی خستە ژێر كۆنترۆڵ و قەدەغە كردنەوە.