نەوا-
پەرلەمانی عێراق لەڕێگەی پرۆژە یاسای بەرەنگاربوونەوەی جگەرە كێشان و سنوورداركردنی دەیەوێت باج بخاتە سەر جگەرە و هاوشێوەی ڤەیپ كار بۆ قەدەخە كردنی بكرێت و تەنیا بە كەسانی سەروو 18 ساڵ بفرۆشرێت.
لیژنەی تەندروستی و ژینگە لە پەرلەمانی عێراق رایگەیاندووە، ڕەشنووسی یاسای بەرەنگاربوونەوەی جگەرەكێشان بە ئامانجی پاراستنی كۆمەڵگە لە قۆناخی كۆتاییدایە و دوای پەسەند كردنی پرسی جگەرە كێشان و بەكارهێنانی ڤەیپ بە یاسا ڕێكدەخرێتەوە، هاوكات پرۆسەی هاوردەكردنی پاكەتی جگەرە، مادەكانی نێرگەلە و ڤەیپ باجی زیادییان دەخرێتە سەر.
بەگوێرەی وردەكاریی رەشنووسی پڕۆژە یاسای بەرەنگاربوونەوەی جگەرە كێشان‌ بێت، ئەگەر لە شوێنە گشتییەكان جگەرە بكێشیت، بە 50 هەزار دینار سزا دەدرێیت، جگە لەمەش هەر فرۆشیارێك جگەرە بە كەسانی خوار 18 ساڵ بفرۆشێت بە 6 مانگ زیندانی یاخود بە پێبژاردنی 250 تا 500 هەزار دینار سزا دەدرێت.