نەوا-
ئەپڵیكەیشنی نێتفلكیس وردەكاری شەڕی بۆكسینگی نێوان دو كەسایەتی بەناوبانگی جیهانی بڵاوكردەوەكە ملیۆنان بینەری تێپەڕاندوە.
نێتفلێكس لە بەیاننامەیەكدا ئاشكرایكردوە، لەكاتی بەڕێوەچونی پەخشكردنی شەڕی بۆكسینگی نێوان جەیك پۆڵی تەمەن 27 ساڵ  و مایك تایسۆنی 58 ساڵ كە پاڵەوانی پێشوی كێشی قورسە، 60 ملیۆن خێزان لە سەرانسەری جیهاندا بینەری یارییەكە چاوەڕوانكراوەكە بون، یارییەكەش گەیشتە 65 ملیۆن ستریم كە بەشێوەی راستەوخۆ لە پلاتفۆرمی نێتفلیكس پەخشكرا.
ئەوەش رونكراوەتەوە، لە یارییەكەدا كە لە ویلایەتی تێكساسی ئەمریكا بەڕێوەچو جەیك پۆڵ لە مایك تایسۆنی ئەفسانەی بۆكسێنگی بردەوە، سەركەوتنەكەی پۆڵ بەكۆدەنگی لیژنەی ناوبژیوانان بو دوای بەڕێوەچونی 8 خولی تەواوی یارییەكە.
باس لەوەشكراوە، تایسۆن دوای دۆڕاندنی ئەم شەڕە 20 ملیۆن دۆلاری بەدەستهێناو لە بەرامبەردا جەیك پۆڵ پاداشتی بردنەوەی بەبڕی 40 ملیۆن دۆلار بەدەستهێنا.