بەڕێوەبەرایەتی گشتی چاودێری وگەشەپێدانی كۆمەڵایەتی گەرمیان لە رونكردنەوەیەكدا رەتیدەكاتەوە رێگریكردن هەبێت لە كردنەوەی سەنتەری ئۆتیزم لە ئیدارەی سەربەخۆی گەرمیان.
لە بەشێكی رونكردنەوەكەدا بەڕێوەبەرایەتی گشتی چاودێری و گەشەپێدانی كۆمەڵایەتی گەرمیان رایگەیاندوە، هەموو ئەو دەنگۆیانە رەتدەكەنەوە كە باس لە رێگریكردنی وەزارەتی كار دەكەن لەكردنەوەی سەنتەری ئۆتیزمی حكومی لەكەلار لەكاتێكدا بیناو سەرجەم پێداویستییەكانی سەنتەرەكەیان لەكەلار ئامادەكردوە وەزیری كار چەندجارێك داوای لە ئەنجومەنی وەزیران كردوە بۆ دامەزراندنی فەرمانبەرو ستافی تایبەت.
راشیگەیاندوە، لە ئێستادا لە هەوڵدان بۆئەوەی لە داهاتویەكی نزیكدا سەنتەری ئۆتیزمی حكومی بكەنەوە لە چوارچێوەی یاساو رێنماییەكان، هەروەك چۆن لە قەزای كفری یەكەم سەنتەری ئۆتیزمی حكومی بە هەوڵی وەزیری كارو بەڕێوەبەرایەتی گشتییان كرایەوەو بەباشترین شێوە خزمەتی منداڵانی ئۆتیزم دەكات.