پارێزگای هەولێر ئاماری سێ رۆژی جەژنی رەمەزانی بڵاوكردەوەو رایگەیاند، پلانەكانیان بەسەركەوتویی جێبەجێكراون.
بەگوێرەی راگەیەنراوێكی پارێزگای هەولێر، بەپێی ئەو ئامادەكاری و پلانانەی بۆ سێ رۆژی جەژنی رەمەزان لەلایەن لیژنەی ئەمنی بەسەرپەرشتی پارێزگاری هەولێر دانرابون وەك خۆی و بە سەركەوتویی و بەبێ گیروگرفت جێبەجێكراون.
راشیگەیاندوە، بەپێی ئامارێكی گشتی لەو سێ رۆژەدا 76 هەزارو 654 گەشتیار سەردانی پارێزگاكەیان كردوە، هەروەها پلانی بەڕێوەبەرایەتی ئاسایشی هەولێر بەبێ هیچ گرفتێك جێبەجێكراوەو بۆ هەرحاڵەتێكی  پێویستیش سەرجەم هێزەكان لە ئەركدابون.
هەر لە راگەیەنراوەكەدا هاتوە، سەرجەم هێزەكانی پۆلیسی هەولێر سەركەوتوبون لە جێبەجێكردنی پلانەكەیانداو لە سێ رۆژی جەژندا 28 تاوان تۆماركراون و 28 تاوانی تریش ئاشكرا كراون، هەروەها بەهۆی پابەندنەبونی شوفێران بەڕێنمایی و یاساكانی هاتوچۆ 4 روداوی هاتوچۆ رویانداوە لەئەنجامدا 12 هاوڵاتی برینداربون، لە هەمانكاتدا 9 حاڵەتی ئاگركەوتنەوە هەبون.