نەوا-
كۆمانیای دانەغاز و كرێسێنت پێترۆلیۆم ڕایگەیاند، لە بەرهەمهێناندا گەیشتوونەتە ئاستی 500 ملیۆن بەرمیل هاوتای نەوت و ئەوەش بە دەستكەوتێكی “گرنگ” ناودەبەن.
ئەو دوو كۆمپانیایە بەیانی ئەمڕۆ پێنجشەممە ڕاگەیەندراوێكیان بڵاوكردەوە، لە سەرەتای مانگی سێی ئەم ساڵەوە، ئاستی بەرهەمهێنانی غازی سرووشتییان لە كێڵگەی كۆرمۆر بەرزكردووەتەوە بۆ 525 ملیۆن پێی سێجا، ئەوەش بە رێژەی 75٪ بەرزبوونەوەی پێوەدیارە بەراورد بە ساڵی 2017.
دانەغاز ڕاشیگەیاندووە، ئاستی بەرهەمهێنانی "غازی كۆندێنسەیتیان" لە كێڵگەی كۆرمۆر بەرزكردووتەوە بۆ رۆژانە 15 هەزار و 200 بەرمیل.
بەپێی راگەیەندراوی ئەو دوو كۆمپانیایە بێت، رۆژانە هەزار و 70 تەن غازی شلی (ئێڵ پی جی) بەرهەمدەهێنن.
لە راگەیەندراوەكەدا ئەوەش هاتووە، تا ئێستا زیاتر لە 3.5 ملیار دۆلار وەبەرهێنانیان كردووە لە هەرێمی كوردستان كە بووەتە هۆكاری ڕەخساندنی 20 هەزار هەلی كاری راستەوخۆ و ناڕاستەوخۆ.