نەوا
کونسوڵخانەی ئەمریکا لە هەرێمی کوردستان بە بۆنەی یادی دە ساڵەی کردنەوەی کونسوڵخانەکە، ئاشکرای دەکات لەو ماوەیەدا زیاتر لە 4 ملیار دۆلاریان خەرجکردووە.

لە رێگەی بلاوکردنەوەی ڤیدیۆ گرافیکێکەوە لە سۆشیاڵ میدیای خۆیدا، کونسوڵخانەی ئەمریکا لە هەولێر ئاماژەی بەوەکردوە، "ویلایەتە یەکگرتووەکانی ئەمریکا شانازی دەکات بە یادکردنەوەی 10 ساڵەی کردنەوەی کونسوڵخانەی گشتی ویلایەتە یەکگرتووەکانی ئەمەریکا لە ھەولێر! 10 ساڵی پڕ بەرھەم و زۆرتری تریش بەڕێوەیە".
کۆنسوڵخانەی ئەمریکا ئاشکراشی دەکات وڵاتەکەی تاوەکو ئێستا چوار ملیار و 334 هەزار و 256 هەزار دۆلاری لە بوارەکانی ئەمنی و مرۆیی و خوێندن و راهێنان و پەرەپێدان لە هەرێمی کوردستان خەرجکردووە.

بێجگە لە خەرجکردنی پارە لە هەرێمی کوردستان، کۆنسوڵخانەی ئەمریکا دەڵێت ساڵانە 300 گەنج لە هەرێمی کوردستان لە رێگەی پڕۆگرامی ئاڵوگۆڕی زانیاری دەنێرنە ویلایەتە یەکگرتووەکانی ئەمریکا.

کۆنسوڵخانەی ئەمریکا لە هەولێر تائێستا هەشت کۆنسوڵی گۆڕیوە، یەکەم کۆنسوڵی گشتی، ئەلێکساندەر لاسکارس بووە، کۆنسوڵی ئێستاش رۆبەرت پالادینۆیە، کە لە تەمموزی 2021 دەستبەکار بووە.