نەوا-
وەزارەتی كارەبای هەرێم رایگەیاند، بە هاوبەشی وەزارەتی سامانە سروشتییەكان هەماهەنگی لەگەڵ كۆمپانیای دانا غازدا دەكەن بەمەبەستی ئەوەی هاوینی ئەمساڵ پێدانی كارەباینیشتمانی بە هاووڵاتیان زیاتر بكەن.
لە راگەیەنراوێكی هاوبەشی وەزارەتی كارەبا و سامانە سروشتییەكاندا هاتووە، بە مەبەستی ئامادەكاری بۆ هاتنی وەزی هاوینی ئەمساڵ، كۆمپانیای دانە غاز هەڵدەستێت بە ئەنجامدانی پڕۆسەی سازدانەوە و چاكسازی لە كێڵگەی كۆڕمۆر.
ئاماژە بەوەشدراوە، ئەم پرۆسەیە لە كاتژمێر 12ـی ئەمشەوەوە دەستپێدەكات و ماوەی سێ هەفتە دەخایەنێت.
لە راگەیەنراوەكەدا ئەوەش خراوەتەروو، هەریەك لە وەزارەتی كارەبا و وەزارەتی سامانە سروشتیەكان و كۆمپانیای دانە غاز هەماهەنگی نزیكیان دەبێت بۆ ئەوەی پڕۆسەكە بەشێوەیەكی سەركەوتوو ئەنجام بدرێت.
باس لەوەشكراوە، چاوەڕواندەكرێت لەڕێگەی ئەنجامدانی ئەم پڕۆسەیەوە ئاستی خزمەتگوزاری كارەبا لە وەرزی هاویندا بەشێوەیەكی بەرچاو بەرز ببێتەوە.